Prujekti ”Meänkieli oon teän kieli” startathiin septemperissä 2019 yhteistyönnä Tornionlaaksonteatterin ja Studieförbundet Sensus i Kalmarin välilä. Takotus oli ette teatterijohtaja Gudrun Skogsberg halusi nostaa kiinostusta kohti Tornionlaakson kultuuria hänen teatterinuoritten seurassa Kiirunassa. Hän halusi näyttää ette kieli ja kultuuri oon sekä jännää ette kaunista ja ette se olla kiinostava kelle tahansa, huolimatta missäpäin maata sitä assuu.
Teatteriryhmä Kalmarista nimeltä Teater Normalla aloit harjottelheen neljä lyhyttä näytelmää jokka perustuu Erik Kuouksun novellikirjhaan nimeltä Autio. Teater Normalla perustuu nuorista 16-26 iässä. Hiihtoluvala 2020 Teatteri Normalla teki opintoreissun Kiirunhaan ja kyläilit monessa paikassa missä novellin tapahutumat sijaitsi, mm. Abiskossa ja Karesuanossa. Net kohtasit kans Pajala Unga Riksteaterföreninkin ja Gudrunin teatterioppilhaat Kiirunan Kultuurikoulusta. Oktuuperissä 2020 ryhmä tuli takasi Kiirunhaan ja yhtenä hälinä net näytitt neljä näytelmää Tärännön folkalla: Isän ääni, Tallarna på Supasvaara, Den gröna jungfrun och Skogarnas Herre. Teatterioppilhaat Kiirunasta olit saanhet oppia lorun jonka ”ryhmä” mässäsi näytelmässä Skogarnas Herre, ja net sai olla myötä näytelmässä osanottajina rituaalissa.
Prujekti oon nyt lopetettu mutta suunitelmia oon ette Teater Normalla itte saatais jatkaa näitten näytelimitten kans etelä ruotissa. Tästä oon seurannu ette Gudrunin Taetterioppilhaat Kiirunsassa oon valinheet näyttää oman versiun näytelmästä Den gröna jungfrun. Se toistuu Abiskossa nälkävuosina 1860-luvula ja sisältää replikkiä ruottiksi, meänkielelä ja pohjoissaamen kielelä. Suunitelma oon kans ette ylläpittä kontaktin joka perustetthiin nuoritten välhiin Pajalassa, Kiirunassa ja Kalmarissa. Ja sillä tavala kans jatkaa verkostotyötä, ajatuksitten ja kokemuksitten jakamista.
Teatteri Normalla Karesuannossa, fepryaari 2020.
